दशैंमा पनि बैंक खुल्ने, अबदेखि मसान्तमा विदा परे खुलाउनुपर्ने

काठमाण्डौ । नेपाल राष्ट्रबैंकले सबै बैंक तथा बित्तीय संस्थाहरुलाई दशैं अवधिमा परेका सार्वजनिक विदाहरुमा समेत बैंक खुल्ला राख्न निर्देशन दिएको छ ।

केन्द्रीय बैंकको बैंक तथा बित्तीय संस्था नियमन विभागले एक निर्देशन जारी गर्दै राजश्व बापत प्राप्त हुने चेक क्लियरिङको प्रयोजनका लागि घटस्थापना(असोज ५ गते)देखि नवमी र दशमी बाहेकका दशैंका सबै विदाहरुमा बैंक खुल्ला राख्न भनेको हो ।

राष्ट्रबैंकले असोज ७, ११, १२, १५ र १६ गते पनि बैंकहरु खोल्न निर्देशन दिएको छ । दशैंको नवमी(असोज १३) र दशमी(असोज १४) गते भने बैंकहरुको काउण्टर खुल्ने छैन ।

साथै, अबदेखि महिनाको अन्तिम दिन(मसान्त) शनिवार वा सार्वजनिक विदा परे पनि राजश्व बुुझ्ने प्रयोजनका लागि बैंकहरु खुलाउनुपर्ने नियम समेत लागूू गरिएको छ ।

अर्थमन्त्रालयको राजश्व व्यवस्थापन महाशाखाले असोज १ गते राष्टबैंकलाई बैंक काउण्टर खुल्ला राख्ने बिषयमा एक परिपत्र गरेको थियो ।

सोही परिपत्रलाई कार्यान्वयन गर्दै राष्ट्रबैंकले दशैंविदा र महिनाको अन्तिम दिन शनिवार वा अन्य सार्वजनिक विदा परेमा राजश्व संकलन गर्ने सबै बैंक तथा बित्तीय संस्थाहरु र राजश्व बापत प्राप्त हुने चेक क्लियरिङ गर्ने प्रयोजनका लागि अन्य बैंक तथा नेपाल क्लियरिंग हाउस खुल्ला राख्न निर्देशन दिएको हो ।

बिज शाला