ओलीको सत्ता भारतले जोगाइदिएको हो ?

नेपाली काँग्रेसका सभापति शेरबहादुर देउवा देश विशेषको नाम लिएर सायदै कुनै टिप्पणी गर्छन् । तर, यसपटक उनले दक्षिणी छिमेकी भारतको नामै किटेर प्रधानमन्त्री केपी शर्मा ओलीसँग जोडे । उनले ओलीलाई भारतको टाङमुनी छिरेको आरोप लगाए ।

सोमबार नेविसंघको स्थापना दिवसमा आयोजित कार्यक्रममा देउवाले ओलीमाथि इन्डियाको शरणमा परेको आरोप लगाउनु निकै अर्थपूर्ण रह्यो । यसअघि माओवादी केन्द्रका अध्यक्ष पुष्पकमल दाहाल प्रचण्डले पनि ओलीलाई भारतले साथ दिइरहेको आशयसहितको टिप्पणी गरे । उनले भारतलाई पनि कम्फरटेबल हुने काँग्रेस र जनता समाजवादी पार्टीसहितको सरकारको पनि प्रसङ्ग उठाएका थिए । ओलीलाई भारतले नै सत्तामा रहन साथ दिइरहेको प्रचण्डको पनि बुझाई देखिन्छ । उनको पछिल्ला अभिव्यक्तिहरुको आशय पनि यही हो ।

प्रचण्डले भारततर्फ संकेत गर्दै ओलीले सत्ताका लागि देश र जनतालाई नै बन्धकीमा राखेको आरोप लगाइसकेका छन् । पार्टी फुटिसकेको र फुटिसकेको पार्टीभित्रको माधवकुमार नेपाल समूह पनि विद्रोही बनिसक्दा पनि ओली सत्तामा टिक्नुले कस्ले जोगाइरहेको छ ? भन्ने प्रश्न उठ्नु स्वाभाविक हो ।

कुनैबेला भारतप्रति कडा रुपमा प्रस्तुत भएका ओली पछिल्लो समयमा नरम बनिसकेका छन् । उनले भारतको सत्तापक्ष भारतीय जनता पार्टीलाई आश्वस्त पार्ने गरी धार्मिक गतिविधि देखि अध्यात्मिक विचारहरु प्रकट गरिरहन्छन् । यसले पनि ओलीलाई भारतले साथ दिएको विश्लेषणलाई बल पुग्ने गरेको छ ।

जनता समाजवादी पार्टीको महन्थ ठाकुर पक्षधर ओलीसँग सहकार्य गर्न थालेको छ । लुम्बिनी प्रदेशमा त्यस्तो सहकार्य देखिइसकेको छ । ठाकुरको भूमिकाले ओली सरकार हटाउने प्रयासहरु सफल हुन सकेको छैन । जसपाको भूमिकाका कारण पनि भारतले ओलीलाई नै साथ दिइरहेको चर्चा चल्दै आएको छ । संविधान जारी गर्दा देखि चुच्चे नक्शा जारी गर्दा ओलीसँग निकै असन्तुष्ट भारतले अहिले किन यस्तो कदम चालिरहेको छ भनी चासो सर्वत्र छ ।

देउवाले त ओलीले भारतको विरोध गरेर चुनाव जितेको र अहिले भारतकै शरणमा परेको खुलेआम भनिसकेका छन् । भारतलाई खुशी पारेर ओलीले सत्ता टिकाउन खोजेको देउवाको आरोप त्यस्तो बेलामा आएको छ जतिबेला उनी प्रधानमन्त्री बन्ने दौडमा अगाडि छन् ।