फेरि बढ्न थाल्यो वायु प्रदूषण, मास्क अनिवार्य लगाउन सुझाव

काठमाडौँ । केही दिन पानी परेर कम भएको वायु प्रदूषण फेरि बढ्न थालेको छ। पानी नपरेको र डढेलोका घटना बढेकाले वायु प्रदूषण बढ्न थालेको हो। अहिले शंखपार्क, भैँसेपाटी, खुमलटारलगायतका क्षेत्रमा राखिएका वायु गुणस्तर मापन यन्त्रले प्रदूषणको मात्रा बढ्दै गएको देखाएको छ।

एक्यूआई १५० भन्दामाथि जानुलाई हानिकारक मानिने गरिएको छ। स्वास्थ्यलाई नै हानि गर्ने खालको प्रदूषण बढेकाले घर बाहिर निस्कँदा मास्क लगाउन स्वास्थ्य विज्ञले सुझाव दिएका छन्।

प्रदूषणकै कारण काठमाडौँ उपत्यकासहित धेरै ठाउँमा बिहानदेखि तुवाँलो लागेको मौसमविद् गोविन्द झाले जानकारी दिए। उनका अनुसार तत्काल पानी पर्ने सम्भावना नरहेकाले प्रदूषण अझै बढ्ने अनुमान छ।

वायु प्रदूषणले दीर्घरोगी, बालबालिका र ज्येष्ठ नागरिकलाई जोखिम हुन्ने विज्ञ बताउँछन्। गाडीबाट निस्किएको धुवाँका कारण पनि वातावरण प्रदूषित बन्दै गएको छ।