सर्लाहीको बाँके जंगलमा यात्रुवाहक बस दुर्घटना

सर्लाही । पूर्वपश्चिम राजमार्ग अन्तर्गत सर्लाहीको बाँके जंगलमा आज बिहान यात्रुवाहक बस दुर्घटना हुँदा पाँच जना घाइते भएका छन् । काठमाडौंबाट धरानका लागि छुटेको प्रदेश १–०२–००१ ख ९७३७ नम्बरको बस अनियन्त्रित भई बाँके खोलाको पुल र सङ्ग्रामपुरतर्फ जाने बाटोमा दुर्घटना भएको हो ।

दुर्घटनामा घाइते भएकामध्ये सुनसरी भोक्राहा नरसिंह गाउँपालिकाका ८ का २४ वर्षीय कोआलम हजामलाई लालबन्दीमा रहेको मोडल अस्पतालमा उपचारका लागि पठाइएको छ । उनको दाहिने हात र खुट्टामा सामान्य चोट लागेको प्रहरीले जनाएको छ ।

त्यस्तै अर्का घाइते सुनसरीकै हरिनगर गाउँपालिका ६ का १४ वर्षीय किशोर अब्दुल आहबको प्रादेशिक अस्पताल जनकपुरमा उपचार भइरहेको छ । उनको दाहिने हात र ढाडमा भित्री चोट लागेको प्रहरीले जनाएको छ ।

यसैगरी अन्य घाइतेहरूमा धनुषा सबैला नगरपालिका ५ मखनाहाका २८ वर्षीय मुकेश रजक, सोही वडाका १७ वर्षीया प्रीति रजक र सोही नगरपालिकाकी २५ वर्षीय राघिनी रजक रहेका सर्लाही प्रहरीले जानकारी दिएको छ ।

बसका चालक धरान उपमहानगरपालिका १७ का ५६ वर्षीय राजन विकलाई नियन्त्रणमा लिएर अनुसन्धान भइरहेको प्रहरीले जनाएको छ । बसमा २९ जना यात्रु सवार रहेका र पाँच जना बाहेक अन्यको अवस्था सामान्य रहेको जिल्ला प्रहरी कार्यालय सर्लाहीले जानकारी दिएको छ ।